Dr Fluxus (lat. flux/fluere = fliessend, vergänglig) isch e Kunstrichdig, wo in de 60er Joor vom 20. Joorhundert seer bekannt gsi isch und isch vo naamhafte Awangardekünstler wie sine Gründer George Maciunas und Nam June Paik und vom Bazon Brock, John Cage, George Brecht, Mary Bauermeister, Wolf Vostell, Arthur Køpcke, Benjamin Patterson, Emmett Williams, Dick Higgins, Ludwig Gosewitz, Alison Knowles, Yoko Ono, Robin Page, Tomas Schmit, Ben Vautier, Robert Filliou, Joseph Beuys und Charlotte Moorman wääsentlig brägt worde. Noch em Dadaismus isch dr Fluxus dr zwäiti elementaari Aagriff uf s Kunstwärk gsi, wo im häärkömmlige Sinn negiert worden isch und as bürgerliger Fetisch gulte het. Was zelt het, isch die schöpferischi Idee gsi.[1]
Tüpisch für e Fluxus isch die künstlerischi Diräkthäit in jedem Medium. So beschribt d Fluxuspublikazioon „How We Met: Or A Microdemystification”, wie die äinzelne Künstler sich s erste Mol drofe häi.[2] D Beschriibig isch gliichzitig d Umsetzig vom ene fluxustüpische Konzept vom George Brecht für die 16. Usgoob vom Magazin AQ us em AQ-Verlag und e kunsthistorischi Sälbstdefinizioon.[3] S Magazin bestoot us Aagoobe und Materiaalie zu de erste Dräffe zwüsche AY-O, Ben Vautier, George Brecht, Robert Filliou, Dick Higgins, Joe Jones, George Maciunas, Takako Saito, Mieko Shiomi, Daniel Spoerri, Robert Watts, Emmett Williams, erwäänt aber au Begeegnige mit vile andere bekannte Künstler und Musiker im Umkräis vom Fluxus.
© MMXXIII Rich X Search. We shall prevail. All rights reserved. Rich X Search